وظائف خالية
..مطلوب فورا رئيس لجمهورية مصر العربية ..المزايا .
.مرتبات مجزية .اقامة بس مش فى القصر ..فى بيت عادى زى كل الموظفين اللى فى الدولة ..بيراعى ربنا فى بلدة ..ما يكونش منوفى ..ما يكونش عسكرى ..مالوش اصحاب من رجال الاعمال خاصة الفاسدين .ما يكونش عندة عيال اسمهم جمال وعيلاءوما تكونشى مراتة سيدة مصر الاولى ..ومايكونشى ليها فى الاعمال الخيرية كفاية عليها الطبيخ وتحمى عيالها بس عشان النضافة والكلام دة .. ما يقرفناش كل شوية على الصبح بخلقتة فى النشرات الاخبارية..( سبحان الله لما كان فى الحكم كان الواحد مش بيحب يشوف النشرة الأخبارية , دلوقت النشرة وكل برنامج اخبارى بقة عندى أحسن من اى فيلم او مسلسل حصرى).. وما يبتدى خطبة بكلمة اخوانى واخواتى ..ومش عايزينة يكون ابونا ..ولا امنا ولا اختنا حتى ..ومش عايزينة يبقى دمة خفيف زى اللى فات ربنا ياخدة .. وياريت من دلوقتى يعرف انة هيبقى رئيس سابق بس ..مش هيبلط فيها 30 سنة ومش عايزين نخرجة بثورة تانية ..ومش عايزينة يبقى رئيس الحزب الواطى ,,,ومش عايزينة يهوب ناحية شرم الشيخ ..لما يحب يصيف يقولنا واحنا نشوف لة شمسية على بحر سيدى بشر ..ولا ميامى هو والعيال..ومايكونشى القائد الاعلى للقوات المسلحة ولا الشرطة ولا حتى مراجيح مولد النبى ..ولا يلبس كل يوم بدلة جديدة ومكتوب عليها اسمة ..هم 3 بدل بس هنصرفهم لية ..بدلة يستقبل بيها الوزراء وبدلة فخمة لاستقبال الملوك والرؤساء الل جايين مصر ..وبدلة حمرا يحطها فى دولابة كل يوم الصبح يتفرج عليها ..عشان يتقى ربنا فينا ..لو ما كانش عادل نلبسها لية ..ومش كل يوم تلات الساعة 9 الصبح يعمل زيارة مفاجئة للمصنع دة ولا للمدرسة دى ولا للوزارة دى..ومش كل يوم يخرج لينا فى موكب ..هو يادوبك توك توك يتنقل بية داخل البلد هو مش احسن من المارد الاخضر ( القذافى) ..ومش كل يوم والتانى واحد يعملة اغنية باسمة ..ومش كل ميدان تبقى صورتة موجودة ولا كل شارع وهو بيبحلق فينا ..ومش عايزين اسمة على المستشفيات والمدارس ..واخيرا ياريت اسمة يكون كمال سعد
ليست هناك تعليقات:
إرسال تعليق